أتورط وحبيتها.. دياب: تزوجت هاجر الإبياري بعد قصة حب 3 سنين

كشف الفنان دياب، عن سبب اختياره لزوجته الكاتبة هاجر الإبياري، مشيرًا إلى أنه وقع في حُبها سريًعا؛ نظرًا لخفة دمها.

وأوضح دياب، في تصريحات تليفزيونية، قائلاً: «اللي خلاني اتجوز اني بحبها، عن قصة حُب استمرت 3 سنين ونصف، عرفنا بعض بالصدفة وهي كانت مذيعة راديو ومكنش عندها إعداد كتير، وحبت هي تكلمني بنفسها تقديرًا ليا».

وأضاف دياب، قائلاً: «لما اتكلمنا،، دردشنا ولاقيت واحدة دمها خفيف جدًا، وأنا أكتر حاجة تجذبني في الست إن يكون دمها خفيف، واكتشفت انها واعية ومثقفة جدًا، وبتفهم في الفن، وبتفهم في الحياة، وفاجأة لاقيت المكالمة اللي هي ازي حضرتك عامل ايه انا فلانة الفانية وعايزاك معايا في حلقة؟، لاقيت المكالمة قعدت بتاع 45 دقيقة، قولت في حاجة غريبة».

واستكمل دياب حديثه عن زوجته هاجر الإبياري، قائلاً: «بدأنا نبقى أصحاب وبدأت أكلمها وأسألها في حاجات، فابتدينا من هنا نبقى أصحاب، وبقت من أقرب الناس ليا، وفاجأة لاقيت نفسي متورط وبحبها؛ لإن ساعتها الحب كان ورطة ومكنتش أحب إنها تحصلّي، ولما حصل اكتشفت إن الحب ده حاجة جميلة اوي».

وأكد دياب، على أن زوجته معتدلة في غيرتها عليه، قائلاً: «مش بتغير وخلاص، احنا في بينا ثقة مطلقة، والحمد لله رب العالمين هي تعرفني وكنا صحاب وقعدنا بنحب بعض شوية، فخلاص عرفتني، مفيش حاجة في حياتي هي مش عرفاها، يعني لو معنديش شغل انا قاعد على الكنبة، نادرًا لما تلاقيني خارج، نادرًا لما أكون في خروجة أو عيد ميلاد».